Saturday, March 31, 2007

Kumpulan Adi-Adi Lampung

KUMPULAN ADI-ADI LAMPUNG

dihimpun oleh
Drs. H. Irfan Anshory (Batin Kesuma Ningrat)

Penyimbang Pekon Sukabanjar, Gunung Alip,
Kabupaten Tanggamus


ADI-ADI PEMBUKA CAWA

Tabik pun nabik tabik, sikindua na ganta
Haga bubalah cutik, lain hak semberana
Mula kususun kicik, sejar guai kekira
Terhadap di sai ramik, perwatin sai mulia

Ki ram ji lana hurik, semapu di pengrasa
Sekali tungga bangik, sekali tungga lara
Agama ngayun betik, delom segala rupa
Sai haram dang tikanik, neraka radu nangga

Hambor titiran ulung, cakak mahligai kaca
Turun di tanoh lampung, hinggop datas bendira
Wai tehili jak gunung, haga nuju humara
Kabarni disan burung, wat nuri pandai cawa



ADI-ADI MERDIKA

Pitu belas agustus, di tahun empat lima
Rani jumahat kudus, tanggal siwa puasa
Ripulusi meletus, indonesia merdika

Badik pedang tihunus, rakyat bila negara
Gegoh banjir rik arus, semangat bangsa kita
Musti hancur rik angus, sapa ngehalangi ya

Ripulusi ram terus, jak aceh mit papua
Dengan niat sai tulus, berjuang gagah nana
Rantai penjajah putus, jak bumi nusantara



ADI-ADI TETEDUHAN

Batangni tihang agung, bulungni kipas cina
Buahni penabuh gung, tikanik bangik nana

Lapahni injing-injing, gegoh burung senggerak
Ratong haga ngemaling, jak jaoh tapok nyurak

Kap rik waw tanoh mekah, ratong mit tanoh lampung
Sai gugor jadi metah, sai hambor jadi burung

(Jawabni: gedang, agas, kuau)



ADI-ADI JINAKA

Cawakon pai di muli, ki debi dang pepidor
Tengliakku ji nyali, gelong gual bang hambor

Gelong gual bang hambor, kambing lapah ngenjala
Injuk hampulak tabor, kucing budagang iwa

Kucing budagang iwa, sai nyepok sai ngeliak
Ampai munih nyak tungga, memok ngelajar mincak

Memok ngelajar mincak, wat nyenyik mampam suling
Abai-abaikon pai nyak, cawa balang reranting

Kuliak guling-gantang, liman dibunuh tungu
Kemincak nabuh gindang, tupai ngudud serutu

Kudengi ngenggarapak, lemaung kuruk bubu
Rungkak beringin balak, disenggayari tungu



ADI-ADI SANAK HARUK

Dengi pai nyak bubagai, jama ahli puwari
Kenyin jejama pandai, riwayat sai kubiti

Riwayat sai kubiti, hurik delom dunia
Diandan ahli wari, beduwa sapa haga

Beduwa sapa haga, tukang kanik mi ngingi
Sanak haruk sengsara, selalu nedos hati

Selalu nedos hati, sedihni mak kehingga
Mit di sai purarepi, mak ngedok sai ngiman ya

Mak ngedok sai ngiman ya, sakik bagimu badan
Sedong jak hulun tuha, mak ngedok peninggalan

Mak ngedok peninggalan, jama diriku sinji
Diandankon kemaman, debi pagi kusuwi

Debi pagi kusuwi, kenyin dang kemarahan
Kapan kuk debi-debi, duwai ngusung lasuhan

Duwai ngusung lasuhan, mulang tongkop di gerih
Sesampaiku di lamban, nyak dikayunkon malih

Nyak dikayonkon malih, haga dipa mak nantu
Lah lawi matti sedih, nasib nimpa diriku



ADI-ADI PEKON

Yu kidah kuta dalom, dedohni gisting raya
Kinandi diri liom, segala serba tuna

Kiri-kananni runtan, pangkalan banjar negeri
Najin nyak ngiri nganan, pagun diku ulangni

Yu kidah punjung batu, ranglaya mit wai berak
Nyak gaoh tiram diku, niku mak tiram di nyak

Madrasah suka raja, ngenjuyukon boloran
Jejama ngandan cinta, kekalau kedoloran

Yu kidah kedaloman, wat surau di duwara
Kekalau kedoloran, terkabul cita-cita

Kedaloman mak jaoh, ana lalat duwara
Sakikni tiram jaoh, miwang mak dapok tungga

Yu kidah suka banjar, sabah tisanik pekon
Repa hati mak sasar, sai ngandan diku lamon

Suka banjar pekon ram, talang padang pos kawat
Ki nyak yu santor tiram, ki niku halok mawat

Yu kidah negeri batin, dedohni suka banjar
Kutilik angin balin, mula kupupun layar

Yu kidah pariaman, mak lalat kantu kuta
Halok nyak lebon iman, ki niku mutus cinta

Yu kidah suka bumi, dedohni kejayaan
Najin ram sumang bumi, taok mata di bulan

Yu kidah banding agung, ranglaya simpang telu
Niku do sai kupegung, kekalau judu temu

Talang padang pekon doh, pasarni suka rami
Sai ngeba angon lesoh, niku sai betik hati

Suka bandung di pugung, lamban ruwa jadi sai
Anggop haga pubandung, mak ganta jemoh sawai

Pekon suka merindu, dunggakni tanjung heran
Niku bakal juduku, radu ditulis tuhan




ADI-ADI SESIMBATAN (MERANAI & MULI)

Api ki laok angkat, nyimbin iwani kodo
Api ki ram mumpakat, dapok kirani kodo
Ki lagi laok angkat, iwa nyimbin di heni
Abang ngajak mumpakat, haga mumpakat api


Najin nyak ngiri nganan, niku panjak di mata
Abang numpang burasan, api niku nerima
Dang diliwih mi ngingi, mi handop delom tingkat
Dang diliwih nyak lawi, anak ngura melarat


Kipas mas kipas pulas, kipas bulung tembaku
Seratus lima belas, acak sai sappi niku
Bela-bela pai pilih, dang mudah ga tikena
Dunia lagi tangih, tanjor mak aru mena


Kuperihkon mak perih, pagun ulang di jambu
Kubarihkon mak barih, pagun ulang di niku
Cawakon pai di makmu, dang pilihmu tenggalan
Najin judu ram hamu, ki mak ranggom di tian


Hulun tuhaku rila, sapa juga pilihku
Mawat ya haga tuna, tinggal nunggu cawamu
Ngerang kumbang di juyu, sebatin rajabasa
Kudengi pai sumpahmu, kenyin hati mak riwa


Kusansat nyapang jimat, mati tulahan payu
Kusansat mak selamat, ki mak bandung di niku
Kapal nuju betawi, ditiup angin barat
Keni nyak tanda jadi, ki abang temon nyansat


Ajo sinjang rik kebat, tanda rasan ram jadi
Kekalau ram selamat, delom neguhkon janji
Ngakan lampu di panggar, puteri ngaji yasin
Pematang jadi datar, ki pilihmu dibalin


Midor-midor mit maja, tudung bulung keluwih
Pitu tahun mak tungga, mawat nyak balin pilih
Api kabar di mekah, ki ratong bulan haji
Pitu tahun kupenah, asal dang mungkir janji


Ki radu rena hamu, dang lagi tirerubah
Nyak nutuk niku payu, niku nutuk nyak lapah
Kantu payu abangku, bismillahi majreha
Ganta nyak nutuk niku, serah badan rik nyawa





ADI-ADI HARAP

Merun di tungku dugan, paroman batang punti
Hasokni dang kesiwan, bubaya dang ki mati

Kayu di tengah laok, ngembulungkon perada
Kucekau ya mak dapok, kutatap luhku bela

Sanak rabai di kibau, cakak di randu mali
Nyak asa di wai rilau, robok mak kupandayi

Dang ditebang ketapang, lidak-lidungmu mandi
Dang dinum wai di kubang, sai diancam batangari

Bukipas budadangin, mandi di kulam rilau
Muluk wai nyindang angin, tangih kidang kekalau

Wai sipa kuinum jemoh, alam kutinding sawai
Kubedak kisir jaoh, keliang cambor di wai

Wai awi wai centigi, wai biah sabah tengah
Kelapa lagi nyigi, dapok kodo tipenah

Sukapadang wai hurang, putih tanjung betuah
Jejama ngandan kumbang, kekalau jadi buah

Radu kuselom risok, lubuk di biding huma
Jadi wai jadi hasok, jadi imbun jejama

Pak bimbang pak ngahalang, pak ngayun pak mak ngeni
Kantu wat pampang malang, burung numpang budandi

Nyak rabai disimbur wai, kantu mak temon mandi
Cambai gugur setangkai, jerejak sanding huwi

Mawat hakni sengaji, ki ngangonkon di bangsa
Mas urai delom peti, banjar selaka ngura

Jukung ratong jak pulau, ngusung kelapa muda
Pati campur begarau, selindang mak burinda

Betikni andang-andang, nyenggayar di sekundi
Humbak nyerapung tihang, mak mundur kulayani

Kantu wat ngehalinak, kumbang hadani tiung
Pelita kurang minyak, mati ki mak ditulung



ADI-ADI TUNGGA

Bugurau lalang waya, najin sungkan tibidi
Kekuwan ram putungga, halok jemoh mak lagi

Bulimau-limau pai do, di wai olok kedundung
Bugurau-gurau pai do, kekuwan ram pubandung

Bela cambai bugegos, gambir bubata-bata
Ram bandung puhahewos, ralang nihan putungga

Betik iringni kitik, haga kuruk duwara
Injuk nginum wai cutik, putungga pinsan kala

Matti bangik cempaka, kumbang mak pandai layu
Matti bangik putungga, puliak gaoh radu

Asing kelomni bingi, wewah ki timbul bulan
Asing sedihni hati, hanjak putungga pinsan

Matti bangik dang asom, halok kucakkon gula
Matti bangik dang liom, halok nyak ratong juga

Induh mesak induk mak, mangga dibah tambiyu
Induh ratong induh mak, ki mak ngingokkon niku

Saka mak tungga dindai, induh ki tahun mena
Asing gelak-gemulai, niku mak pandai lupa

Lah lawi hiwang lawi, batui mak pandai bela
Gincing kanan di bumi, niku santor tabinta

Mak pandai bela-bela, awi rijakni resi
Mak pandai lupa-lupa, niku sai betik hati

Mandi di wai maringgai, timbuk bokor selaka
Kutuliskon di tanggai, saking mak dapok lupa

Matti bangik dang lioh, hatokni lawangkuri
Matti bangik dang jaoh, putungga debi pagi

Najin rukukni bela, apuini dang ki padom
Najin ram ralang tungga, dang rubah hati delom

Ganta nyanik titian, pakai nyemberang kali
Ganta nyanik bitian, mak ganta kapan lagi



ADI-ADI RASAN

Mawat kubuang jala, ki mak iwani lamon
Mawat kubuka cawa, ki mak cawa setemon

Cakak di kapal siyom, bulayar mit betawi
Kinandi diri liyom, nenggarah matarani

Kinandi gila ading, siri nihan do hati
Ki tidacing nyak miring, huwok di hujung tapi

Nyak nyomor di kaponggor, kayu tenuar nambi
Nyak nyomor niku pintor, pandai sekula ngaji

Asing lamonni kasai, mak liyu kasai batu
Asing lamonni indai, mak liyu kantu niku

Kudengi nyirih-sirih, wai di kendali pekon
Najin wat indai barih, di niku nyak sai demon

Batangari wai tebu, banjir keliwat harus
Taki pandaiku diku, cinta mak pandai putus

Haga nyak nanom kupi, ki dikeni dunia
Haga nyak mit di kuti, ki dikeni ranglaya

Segalani kusansat, sanajin labung batu
Di niku rang bupukat, ngeradukon tinemu

Wai lunik jak pematang, pancuran bulung randu
Nyak sakik kalau senang, ki pubandung di niku

Kantu niku mit duwai, tenggarah batang jambu
Kantu niku mak pandai, mak judu kantu niku

Cakak nyak mit pematang, ngibarkon kain handak
Ki judu wallah alam, ki niat mak dapok mak

Mengkudu ki ya kayu, cempaka ki ya ngumbang
Judu ram ki ya laju, bitian ki ram lipang

Semampuk jukuk juyu, maju-majuni sanak
Lambat yu ringkas payu, nutuk pilihmu ki nyak

Kutulis malam kemis, radu di rani sabtu
Cawaku radu habis, tinggal nunggu jak niku



ADI-ADI TIRAM

Bayang-bayangmu kundang, ratong di tengah bingi
Minjak diguyang hiwang, niku delom hanipi

Luah nyak mit tangebah, mejong di lambung batu
Nenggarah bulan wewah, tabinta munih niku

Kutenggarah di bulan, rindu mendayu-dayu
Kidang pagun mak pampan, ulih lain pudakmu

Haku wewah bang kelom, bulan tanggal sehari
Haku lupa ki pedom, bang tungga di hanipi

Payah nyak hani langgam, nimba laok sebuku
Payah nyak ngandan tiram, bangik ki riya niku

Cakak jan nimpat lesung, sanak lapah sekula
Tekacai sai kupegung, kapan niku tabinta

Kelapa di duwara, tanohni haga tejuh
Kapan niku tabinta, badanku lemoh lumpuh

Betik susunni piring, sudu delom pengantak
Badan kurasa maring, ki niku mak kuliak

Punyanamu mak gindam, wai di lambung talos
Punyanamu mak tiram, kinandi payah nedos

Mesak manggamu kodo, diperom dibah jami
Gegoh nyak niku kodo, tiram dawah dabingi

Kudengi nyiram-siram, labung di tengah laok
Lain ki nyak mak tiram, haga tungga mak dapok

Kapan kuk debi-debi, nyak nangguh sakik hulu
Kidang mawat sekali, budiku tiram diku

Wailima padasuka, kedundung kububatu
Kubabangkon di sapa, ki nyak tiram di niku

Dulik-dulik di ranjang, bubantal bukelambu
Minjak munih nyak miwang, rasa diguyang niku

Relomni wai kuselom, pagun mak tungga batu
Relom bingi mak pedom, santor tabinta diku



ADI-ADI SARIH

Kawai handak juga nyak, mak kupabalin-balin
Sarih diku juga nyak, mak kupamain-main

Matti herum melati, mak gegoh di cempaka
Debingi kuhanipi, dawah disepok mata

Keris ruwa nyak kodo, midor di pasar banton
Hilang nyawa nyak kodo, ampai dipangka temon

Wai jelai jambat ampai, ranglaya padang ratu
Kageringan ram ampai, kekalau jadi judu

Haga nyak mandi di mas, selom selonsor dinton
Niku penyambung napas, nyak ngeradukon angon

Mak dapok menok laok, tabinta di tanjungan
Nimpat jan kuruk rangok, niku guai gantungan

Najin hujan dang labung, kemarau dang ki panas
Nyak nutuk dang diusung, nyak tepik dang ki tikas

Mejong-mejong di jambat, nunggu hulun teliyu
Sapa liwat kusambat, nyak ngulih-ulih niku

Mustahil ya mak banjir, ki rani labung dunggak
Mustahil nyak mak watir, ki niku watir di nyak

Mandi di kulam yaman, sehari bulan haji
Payah netopkon iman, niku pengguda hati

Mak barih kantu paku, jukuk di tengah sabah
Mak barih kantu niku, sungi angon mak rubah

Pelok awimu pelok, pelok panjang selawi
Niku kubekom redok, sanajin guncang bumi

Kuliak niku medoh, hilokmu paku layu
Repa wai disop tanoh, kageringku di niku

Nanom rampai biding wai, tuoh di gelir batu
Repa sirokni rantai, riya nyak jama niku

Asing wewahni bulan, mak liyu matarani
Niku juragan lamban, mak niku sapa lagi



ADI-ADI LAYAU

Jak lunik sinjang lilik, balak sinjang serilang
Jak lunik ngandan sakik, balak mak nungga senang

Ngelagok nyak di punai, punai rindu di kawat
Nyak hanyuk lain di wai, sai ngandan diri mawat

Sinjang kebatku mawat, sinjang sarungmu lamon
Sai ngandan diri mawat, sai demon diku lamon

Dang miwang niku maju, kantu bubar mak pangan
Sai demu radu nantu, sai di nyak wallah alam

Kudengi nyak wai nyak wai, hani sai ketutungan
Nyak harap kilu tawai, hurikku ji tanggungan

Yu kidah sarat urut, belimbing di pangkalan
Ki hati tipadurut, api lajuni badan

Ngejintuk benang kusuk, benang panjang selawi
Nungah lelakun binuk, temang mak bangik lagi

Ibarat wai di gelas, panjak kidang mak nyata
Gering kubatok bibas, rabai kantu kentara

Ngenggulai tangkil sigi, mak munih bukelapa
Sakik seribu rinci, lelakunku ji ganta

Mit duwai pancur langok, mulang mandi di imbun
Luh bela badan langok, ngembabiti lelakun

Legundi laok sepi, pengintaianni bajau
Ki reji juga hati, angon-angonku layau

Gumuruh delom sangkar, manuk lebon kelabai
Ngeliak bulan tetar, badan hancur jadi wai

Pisang mesak di juyu, bela dikanik tupai
Miwang nyak radu leju, gantung galah nyak rabai

Ngedentum lain humbak, kelapa gugor kering
Lain tutukan ki nyak, perahu gincing miring

Tawai pai nyak pastakun, ilmu bawanku mati
Mak guna nyak disantun, ki napasku mak lagi



ADI-ADI HIWANG

Sakikni diri miskin, selalu mandi di luh
Di dunia tesimbin, hulun mak ngedok teduh

Mit duwai tongkok lihai, mulang tongkok semambu
Niku lalang ngelahai, nyak miwang nampon dagu

Kipak riya dang riya, retak ngelilik jagung
Kipak riya dang riya, dang pungah ga telangsung

Sekapanni pangiran, jendilani selaka
Lain niku mak kuiman, mak kelanggar di bangsa

Tanjor wai kurarobok, niku mak temon mandi
Tanjor rusia dapok, mak temon dilayani

Ana bintang tejurai, di juyu rajabasa
Muluk lindung delom wai, mustahil cawamu na

Kuteduh kumbang hara, kirani bunga tebu
Kuteduh temon cinta, kirani ngampalaju

Lampu lin lampu lilin, selubung damar kaca
Najin haga dibalin, dang dibuang tegah ga

Daikin dipudacing, perahu bawan minyak
Daikin dipusahing, radu nantu kalah nyak

Daikin nyebak pisang, kantu mak mansa gula
Daikin nyak diladang, ki bakal riwa-riwa

Wai rilau niyau-tiyau, pangkalan pancur minyak
Nyak layau dipulayau, niku ngampalaju nyak

Lain kusuk jak uncuk, kantu kusuk jak batang
Lain nyak kurang bentuk, kidang niku mak sayang

Haku ji niku nyomor, bang kirani mak haga
Haku niku sebenor, bang kira nipu daya

Serisokni kupelok, sekejungni pembuyu
Serisokni kupenok, selayauni hatiku

Jak ipa haga dipa, jak tandang haga mulang
Kayu nebak ranglaya, umbankon ya ki nyadang



ADI-ADI LIPANG

Tepik pai niku lamban, nyak haga lapah jaoh
Ki wat bagian badan, kekalau balik muloh

Kita pulipang jaoh, pulipang sumang bumi
Pisah badan ram gaoh, mak pisah ki di hati

Dang ducakkon mi lagi, bitah tirahmu mengan
Nyak lapah purarepi, induh dipa harungan

Injuk mak haga lipang, pakat kita sai radu
Ganta ji nyak dibuang, alhamdulillah payu

Gegoh mutuskon nyawa, pulipang jama niku
Gedahni tuhan kaya, judu ram mawat temu

Dang disusul ki tegi, panasni giang-giang
Mawat nyak sampai reji, ki niku temon sayang

Api lajuku betoh, seminggu nyak mak mengan
Api lajuku jemoh, pudadayu tenggalan

Ki ngitung bangikni bung, haga dang jadi awi
Ki ngitung bangik bandung, haga dang lipang lagi

Hamu lepang bang gedang, hantimun belah pitu
Hamu lipang haku dang, nyak pagun sarih diku

Semakkungni wai rawang, nyak mena hila-hilu
Semakkungni ram lipang, nyak mena pudadayu

Cadang ladingku cadang, kupepatkon di perih
Cadang hatiku cadang, andahmu mak ki barih

Pahik kinandi pahik, nganik bulung paria
Sakik kinandi sakik, lipang jak kundang saka

Lah lawi matti helom, lelubi ampai mesak
Lah lawi matti nalom, niku ngampalaju nyak

Lah lawi matti lunik, nyapai bulungni ranji
Lah lawi matti sakik, pulipang lain mati

Lah lawi kapan lagi, kapal labuh di suwoh
Lah lawi kapan lagi, kita pubandung muloh




Pagun haga Adi-Adi?

Kupancas bulung talos, luah wai jadi minyak
Suratku mak dibalos, api sunyamu di nyak

Buhuma lain ngebun, kayuni pulalunggu
Bela bulan rik tahun, ngetatunggu cawamu

Kudengi nyak mit nyak mit, ulangni nyak mit hamu
Ranting dililik bait, nyak tilenau andahmu

Kapan lagi mak mandi, wai kulam di tangebah
Kapan lagi mak jadi, cawa sipa dipenah

Ki bakal ngampalaju, acak ikin jak ganta
Nyak mawat haga hamu, kenyin nyak bukekira

Tandang kecambai lanak, sai kuning mak ngehalu
Dang niku rabai di nyak, nyak rabai kantu diku

Nyak magoh lain nyuwoh, nyak siri nagu niku
Kantu pilih mak gegoh, mula nyak pagun nyemu

Jumahat ganta kodo, mula rani penglabung
Disaratkon nyak kodo, mula angonku langsung

Haga repa cawaku, ki cina ratong nagih
Haga repa lajuku, ki niku balin pilih

Pas-pus jalan terus, mak minok di ranglaya
Hatiku radu harus, haga lapah semanda

Najin nyam lagunkon pai, kayu dunggak pematang
Najin ram hulunkon pai, ki hati parda senang

Yu kidah kumbut lepun, tipakai tegi rani
Temadan diakuk hulun, acak mulang muwari

Awas-awas seluang, ganta barak ngenjala
Awas-awas sai nunang, ganta barak sesera

Mula nyak segok di umbul, di pekon lamon beji
Seribu umat kumpul, badan mak kena cari

Kati sungkanku duma, nyak rabai kantu panas
Lelakunku ji ganta, nganik runtan semawas

Lain ki saking bangik, nyak ji bulamban mena
Kidang reji ki sakik, mak riya kindo repa

Tak-gertak gernang-gernang, pangkalan raja mandi
Nyak mena nyecar rangrang, bubedak dang ki beni

Hana-hanani tohot, kayu di biding huma
Hana-hanani lohot, seingok’an dang lupa

Ki niku tiram di nyak, tontong iringni bulan
Di matarani minjak, diya sungini badan

Sikop bukawai handak, meranai tejang tanggai
Dang ditumpakkon di nyak, mit kiri-kananku pai

Riah-riuh di lebuh, sanak main biula
Karai penunggu tiuh, ya nihan pusikam na

Selamat tinggal puwari, nyak haga lapah perang
Kantu nyak mati dudi, nanti namaku mulang

Pekon pak kelumbayan, kelima pekon paku
Betik-betik tindayan, inton pucampur batu

Saresatku di jagat, sarihku di dunia
Ki bintang ji lagi wat, mak bulan surut mena

Yu kidah jambat runih, ranglaya mit di rebang
Bela-bela pai pilih, dang nyesol jadi hiwang

Tetak-tetak kebunmu, kenyin dang limuk juga
Tetop-tetop imanmu, dang ginjah-ginjuh juga

Matti bangik dang paku, kutanom di duwara
Lohotku jama niku, dang batal kena guda

Terkuku mandu-pandu, titiran mandang bulan
Lohotku jama niku, dang ngeruwa labuhan

Yu kidah sumbah siyah, keliangni kelingi
Kantu wat cawa salah, nyak mahap jama kuti

Pukul pak pukul lima, pukul setengah lapan
Sikam malih jak ija, dang seperos-baitan

Kantu wat tekelincap, cawa nambi keruwa
Jejama kilu mahap, ram selepasan dusa***

3 Comments:

Blogger rahmad desmi said...

assalammualaikum,
bang Irfan. alhamdulillah bisa baca sajak2 lampung-nya. Saya orang Abung/logat O, tapi senang juga rasanya membaca sajak2 ini.



rahmad
ps: sekitar 10-15 tahun lalu pernah beberapa kali bertemu di kios buku loaknya mang Udin di Cihapit ya

August 21, 2008 at 9:09 PM  
Blogger Hartono Djasman said...

Ekheh Moneh adi adi hena Tin, bang ngeba tadasokh, Ok Selamat pakhda Munyai.

October 12, 2008 at 8:45 PM  
Blogger Prabu said...

Aslm. salam kemuaghian Bang, Helau munih bang tulisanni ! Salam jak Prabu, ganta nyak lagi kuliah di ITB. situsku di www.kupilampung.co.cc

November 4, 2008 at 5:11 AM  

Post a Comment

Subscribe to Post Comments [Atom]

<< Home